2:12 صباحًا 12 ديسمبر، 2018

نسايم حب قصة قطرية في قمة الروعة

نسايم حب قصة قطرية في قمه الروعه

الكاتبه تحفه فنيه

-

 

الجزء الاول

اليوم طاف على موت امي عفراء الله يرحمها اسبوع .



هي صدق كانت مشلوله ولا تتحرك من سريرها بس والله كانت مسويه للبيت حس والاهم انها كانت كل اهلي وبعد موتها حسيت صدق اني تيتمت يمكن انا اكثر وحده حسيت بفراقها والايام الجايه بيزيد احساسي بذا الشيء بس لازم ما ابين لحد ضعفي او خوفي من المستقبل وخاصة العيال لازم اتم في عيونهم الجبل اللي ما يقدر شيء يهزه والحمد لله .



الله قدرني الى ذا الحين انا مسيطر على الوضع .



وتقريبا كل شيء رجع مثل ما كان خاصة بعد ما سافر حمد جعلني فداه الامارات حق الكليه العسكريه

و ارجعوا البنات يدومون عفاري في الجامعة و الريم في المدرسة .



مسكينه الريم كان عيد ميلادها من ثلاث ايام ولا احد حتى بارك لها صار لها شهرين وهي تحن تبي تحتفل بالسويت سكستين مثل الاجانب .



الاخت واجد تشوف افلام اجنبية صدق اني كنت معترضه على ذا الشيء ولا احب احتفل بذا الاعياد بس والله اكسرت خاطري عشان كذا لازم اجيب لها هديه .

سونيا وهي تطق الباب



ماما ماما فهده

فهده بعد ما صغرت شاشه الورد اللي تكتب فيها مذكراتها وروحت تفتح لها الباب قالت:

خير يا طير وش تبين



توني طالعه منس

سونيا



ماما شمله في تحت يبي انتي .

فهده من اسمعت ان جمله جات راحت لها ركيض جمله بنت خال فهده والوحيده من اهل امها اللي في قطر بحكم انها متزوجه قطري عشان كذا هم كانوا واجد قراب من بعض

جمله وهي تلم فهده



عظم الله اجرس في ام جابر

فهده وهي تلم عليها هي بعد



اجرانا وجرس .



الحمد لله على السلامة .



متى رجعتي

جمله وهي تفك فهده وتروح عشان تقعد على الكرسي ويدها في يد فهده تجرها عشان تقعد معها



الله يسلمس رجعنا البارح فليل والله يا فهيده اني ما دريت الا البارح الصبح عن ام جابر ولا كان جيتس ولا خليتس بالحالس في ذا الوقت

فهده وهي تاخذ نفس عميق وتحاول انها تخفي دموعها قالت



مسموحه جعلني قبلس ولفت تشوف باب غرفه ام جابر اللي بابها في وسط الصاله وهي تبكي وقالت



البيت كله لها الله يرحمها كنت اقضي طول اليوم معها ذا الحين احس اني ضايقه ولفت تشوف جمله وكملت



هذا وهي ما طاف عليها الا اسبوع اجل ما دري وش بسوي بعد شهر؟

جمله وهي تحاول توسي فهده قالت



الله يرحمها ترحمي لها الله ريحها من اللي كانت فيه ولا من كان يصدق ان ام جابر القوية اللي ما كان حد يقدر عليها تطيح ذا الطيحه وتصبر عليها سبع سنين



ويوم شافت فهده ارفعت راسها تشوفها والدموع تزيد في عينها استلامت فيها وقالت



اسمحيلي ما كن قصدي اذكرس بشيء .



الله يرحمهم كلهم

فهده وهي تمسح دموعها اللي ما تسمح لحد يشوفها غير جمله قالت لها



ليه من قال لس اني نسيت عشان تذكريني



ما با احد ينسى اهله وحتى اذا نسيت الدنيا لازم بتذكرني بهم الى جارت علي .

اقطعتها جمله وقالت



الله يسامحس ليه تقولين كذا ان شاء الله ما تنضامين وانا موجوده .



ولا انا ما ينشد فيني الظهر

ابتسمت فهده غصب عليها لجمله وقالت



جعلني ما ابكيس ما تقصرين بس انتي تدرين بالحال .



انا ذا الحين صرت بالحالي مسئوله عن البيت والعيال هم يتامى ولا لهم حد غيري وعمهم خالد الله خير ما فيه خير لعياله وامرته عشان يصير فيه خير لنا غير ما شفناه الا ثلاثه ايام العزاء وعقبها اختفى عند امرته الثانية .

جمله باستغراب



الله يهديس يا فهده صلا انتي اللي شله البيت وكل شيء على ظهرس من سبع سنين ولا ام جابر الله يرحمها لا تروح ولا تجي وبعدين ناصر وين راح اشوفس ما جبتي طاريه مع انه ساكن معكم في نفس البيت



صدق في ملحق برى الفله بس في نفس البيت يعني وقت اللي تحتاجونه بتلقونه

فهده وهي تكرمش بوجهها قالت



الله يخليس عاد الى طريتي الرجاجيل تطرين نويصر هذا ازين ما فيه اسمه وخساره فيه بعد

جمله وهي تهز راسها قالت



الله يقطع عدوس ليه تتحاكين عليه كذا كنه اصغر عيالس ما كانه رجال

فهده وهي تاخذ الدله عشان تقهوي جمله قالت عشان تغير الموضوع



جمله وش اخبار عرس اخوس

جمله اللي افهمت حركت فهده قالت لها وهي تبتسم باستهزاء



يا دفع البلاء يا فهده انتي الى ذا الحين شاله عليه في قلبس



هو صدق غلط بس بعد خذ جزائه وجابر وابوه الله يرحمهم ما قصروا فيه ولا تنسين انه كان بزر يوم سوى كذا .

اقطعتها فهده وقالت



ثمان تعشر سنه ما هب بزر .



غير رجال وش كبره



وعلى العموم انا ما عاد ذا السالفه تهمني ولا هو يهمني واصلا طول ذا السبع سنين وحنا كلن منا في حالة صدق هو ما قصر مع حمد ولا خواته في شيء يبونه .



بس عمرنا ما كان بينا اي حكي غير في النادر ويكون شيء عن البزران بعد لان ام شيخه الله يرحمها هي اللي تتحاكا معه في كل شيء اما ذا الحين دامه مع عيال اخوه صلاح ما نبي منه شيء ثاني لكن انا عمري ما طلبت منه شيء ولا نزلت راسي له في شيء الحمد لله تقاعد ابوي مكفيني .



الله لا يحوجني له .

جمله قعدت عند فهده الى ان جات حزت طلعت البزران من المدارس راحت جمله تجيب عيالها من المدرسة وفهده اخذت سونيا وراحت مع الدريول تجيب ريم من المدرسة

ريم اول ما اركبت السيارة



.

فهده



عليكم السلام اعلومس ام العلوم

ريم اللي لفت تشوف فهده



علوم الخير تبين الموجز ولا الاخبار

فهده وهي تهز راسها



لاذا ولاذا .



امزح معس .



انتي صدقتي اني بقعد اسمعس

ريم بعد ما اسمعت كلام فهده ابتسمت ابتسامه نصر لانه تحب تطفر بها .



وقالت



عفاري متى بتج انا ما اقدر انطر ميته من الجوع

فهده قالت لها بدون ما تلف عليها



مدري تقول عندها شغل وبتتاخر تبي تروح المكتبه تجمع مراجع .



وتقول انها متفقه مع عمها يمر عليها فهده كان ودها تقول عمت عينه بس هي ما تحب تتكلم على عمهم قدامهم وتخرب صورته عندهم .



وقالت لريم بعد ما تذكرت انها تبي تشتري لها هديه



ريم اسمعي بما ان اليوم الاربعاء وباكر اجازة وش رايس نروح انا وانتي و عفاري السوق

ريم ردت بسرعه



لا اليوم ما اقدر عمي مواعدني انا و مريوم بيودينا مكان مفاجاه

قالت لها فهده بعصبيه



ومن بشوره بتروحن

ريم بعند



بشور عمي اظن انه رجال البيت

اسكتت فهده عشان تنهي النقاش.

ولفت الصوب الثاني وهي تقول في خاطرها جعله فقيدت الرجاجيل .



واول ما ادخلوا البيت شافوا سيارة ناصر واقفه في الاطبيله فهده خافت انه يكون نسى يجيب عفراء من الجامعة نست انها متهاوشه مع ريم لفت عليها وقالت



روحي بسرعه لعمس شوفيه متى بيجيب عفاري



لا يكون نساها

ريم اللي كانت تبي تحسن الجو بينها وبين فهده انزلت من السيارة وراحت سيده لملحق عمها اللي عايش فيه من عشر سنين وهو عبارة عن غرفه وحمام وصاله صغيرة في طرف الحوش وطقت الباب عليه وهي تشوف فهده اللي واقفه على الباب حق الصاله تنطرها .

ناصر اللي كان توه داخل ويبدل ثيابه استغرب من الطق على الباب وراح بسرعه عشان يفتح الباب خاف ان حد من اهل البيت فيه شيء .



اول ما شاف ريم واقفه على باب الملحق وهي بعباتها و شنطتها في يدها ابتسم لها وقال



حي والله ذا العين وسكت يوم واجهته ريم وهي ترد له الابتسامه وقالت



الله يحيك ويبقيك يا زين شباب قطر كلهم والله لمها ناصر من كتوفها وهو يقول



حياس ادخلي في البراد عن ذا القوايل .



بس ريم امسكت يده وهي تشر باليد الثانية على فهده وقالت له



عمي .



خالتي تحاتي عفاري وتقول لا تنسى تجيبها .



ناصر رفع عينه يشوف مكان ما اشرت ريم شاف فهده واقفه قدام باب الصاله ويوم شافته يشوفها ادخلت البيت بسرعه .



نزل عينه على ريم وقال لها



قولي لها انا ما انسى شيء عفراء جبتها وقدها في دارها .



وكمل يوم شاف الطباخ جايب له الغدا



ريمي ادخلي تغدي معي ريم قالت وهي توخر عن طريق الطباخ اللي يبي يدخل الصينية



ان شاء الله بس بروح اقول لخالتي عن عفاري وببدل بسرعه وبجي انطرني لا تتغدا قبل لا اجي وقالت بصوت عالي وهي راحيه للفله



عندي لك اخبار عجيبة

ريم وهي قاعده مع ناصر تتغدا



تدري اليوم ادخلت علينا بنت خالك احتياط وقعدت تسولف معي ولما ما شافت عمها اهتم في الموضوع قالت له



تدري عن ويش كنا نسولف نسولف عنك وابتسمت يوم رفع ناصر راسه وعيونه فيها نظره استغرب وقال



عني انا



ليه وش كنتوا تقولون عني

ريم



هو ما هب سولف سولف هي كانت مستغبيتني وتبي تاخذ مني معومات عنك بس انا لعبت في راسها عدل وخليتها تطلع من عندنا وهي تهوجس .

ناصر اللي كان يقرص عينه في ريم قال



ليه هي وش المعلومات اللي كانت تبيها وانتي وش قلتي لها



ريموه بلا كذب .



تحاكي وقولي الصدق .

ريم وهي تلوي ثمها يمين ويسار قالت



الله يطول في عمرك هي كانت تسال اذا انت تقعد معنى وتراعينا ولا حنا ما نشوفك



عاد انا ما رضيت انها تتكلم عليك فقلت لها انك ما انت بمخلي علينا قاصر وانك ما تفارقنا ليل ولا نهار .



ابتسم ناصر وقال



مشكوره يا بنت جابر على دفاعس عني ورجع يكمل غداه بس رجع يرفع راسه بسرعه لريم يسمع كلامها اللي قالته بعد ما ارتاحت من رد فعل عمها على الموضوع



وقلت لها بعد انك من حبك فينا تسهر معنا الى ان تنام ويانا خاصة بعد ما سافر حمد .

قطعها ناصر بسرعه



انام وياكم وين ريموا ان متى نمت عندكم

ريم ردت بسرعه عشان تهدي عمها



اقصد انا اسهر عندك وانام عندك انت فهمت الحكي بالغلط .

شافها ناصر من فوق الى تحت وهز راسه ورجع ياكل ارتاحت ريم ان عمها صدقها وسكر الموضوع وهي تقول في خاطرها اجل لو تدري وش قلت لها بعد وش بتقول ما هب مهم حتى اذا دريت المهم ان رفوع الخايسه ما توصل اللي تبيه .



واللي قطع عليها افكاره كان صوت ناصر وهو يقول لها



قولي لعفاري و لخالتس ان يبرزون عشان العصر بنطلع كلنا

ريم وهي متشككه قالت



بس عمي انت تدري ان خالتي ما تطلع معنا اذا انت مودينا مكان

قال ناصر لها بحزم



بس انا ما هب مخليها في البيت بالحالها وهي ما با احد معها اول تقعد مع امي عفراء ذا الحين ما لها قعده بالحالها اما تروحون كلكم ولا تقعدون كلكم .

ورفع حاجبه بتحدي لها وكمل



انتي اختاري

ريم بعياره

خالتي الله يخليس لا تخربين الروحه علينا .

فهده بعصبيه



وليه اخرب الروحه عليكم انتوا بنات اخوه روحوا معه انا وش حاجتي اروح معكم



انا بقعد في البيت مثل كل مره تطلعون فيها مع عمكم .

ريم بضيق



بس ذا الحين غير .



ذا الحين مابا حد يقعد معس في البيت وحنا بنتاخر .



وهو يحاتيس

اذا جلستي في البيت بالحالس و.

اقطعتها فهده وقالت وهي مستنكره



يحاتيني



لا راعي واجب ويعرف المعاريف ما في حاجة يحاتيني ولا شيء .



انا كبيرة ولا اني بزر عشان يحاتيني .



روحوا انتوا معه لكن انا انسي .



وقامت من الصاله عشان تركب الدرج وتروح غرفتها .



لفت ريم على اختها عفراء اللي واقفه جنبها بعايتها وهي شوي وتصيح وقالت



ذي ما هي بحالة هو يقول يا نروح كلنا ولا ما نروح وهي معيه تروح معه وانا اللي تطيح في راسي

ابتسمت لها عفراء و فصخت عبايتها وقالت لريم اللي تشوفها بحسره



ولا تطيح في راسس ولا في رجلس .



انا بقعد مع خالتي وانتي روحي مع عمي وقولي له اني انا عندي ابحاث واجد بسويها ولا اقدر اروح معكم .



وان خالتي بتقعد معي .

افرحت ريم بقرار عفراء واجد وقررت هي بعد انها تستانس بذا الطلعه مع مريوم بنت عمها خالد هي صدق اكبر منها بسنتين بس واجد متعلقين في بعض ويوم قالت لعمها عن فهده وعفراء عرف ان السبب الحقيقي هو فهده .



اكيد هي اللي عيت وعفاري فديتها هي اللي ضحت عشانها بالطلعه .



يلا ملحوقه ان شاء الله في يوم بوديها بالحالها وبخلي ام اللسانين عن خالتها

اول ما وصلوا بيت خالد دخل ناصر سيارته في الحوش وسوى هرن لمريم بنت اخوه عشان تطلع لهم بس اللي طلع كان حمد ولد خالد الكبير وراح لدريشه ناصر اللي نزلها اول ما شاف حمد جايه وقال حمد وهو يحط يده على الباب حق السيارة ويفتحه



يا مرحبا.

يا مرحبا حي الله ابو حمد .



اقلط .



اقلط المجلس .

ناصر



والمرحب باقي غير ما هب جاي اقعد معك ابي فرقا وجهك .



طول اليوم وانا مقابلك

حمد وهو يسوي نفسه زعلان قال



افا ليه كذا يا عمي

ناصر وهو يجر باب السيارة عشان يسكره قال لحمد



عمت عينك .



جدك انا



كل اللي بيني وبينك اربع سنين يا الجحش

اضحكت ريم على فشيلت ولد عمها وسكتت يوم قال لها حمد



ريموه تلايطي قبل انزلس من السيارة واكوفنس بذا العقال .

ناصر رد عليه بسرعه



كان في ابوك اللي ما ادري وينه خير جرب اختك وين

حمد وهو يبتسم قال



بتجي وبعدين انت ليه اليوم معصب ما خبر يوم طلعنا من الشركة الظهر فيك شيء مزعلك



وذا على الشيخه ريم ترى انا اضحك معها

ناصر قال وهو يشوف مريم جايه



ما فيني شيء المهم انا اليوم ما هب جاي الشركة بعد المغرب انت اذا رحت مر مكتبي بتلقي الفاكس حق البضاعه اللي في الجمارك عطه فتحي خله يخلصه لا تنسى .



يلا مع السلامة

ناصر وهو يوخر عن السيارة



ان شاء الله .



الله يحفظكم

اركبت ريم السيارة وطلع ناصر بهم واشتغلت الحشره على راسه اول ما اجتمعوا الثنتين .

ناصر اللي كان موديهم عشان يشتري لكل وحده فيهم لابتوب عشان يفكونه من حشرتهم اللي مسوينها له من كم شهر وداهم جرير وخلاهم يختارون اللي يبونه .

ومثل العاده اخذوا نفس الجهاز ثنتينهم وبعد ما خلصوا وداهم محل كمبيوتر عشان ينزل لهم في الاجهزة البرامج اللي يبونها ولا خلصوا الا على الساعة تسع والاخوات اصروا انه يمر يشتري لهم عشا من الكنتاكي .



وهم مخلصين من كنتاكي ورايحين لبيت خالد عشان ينزلون مريم وكانت الساعة عشر تقريبا .



رن جوال ناصر وكانت المتصلة هي عفراء .

ناصر بتعب



هلا والله بالغلا عفاري

عفراء بصوت مخنوق



عمي

ناصر تخرع من صوت عفراء وخاف .



قال لها



عفور وش فيس وش يعورس

عفراء وهي تحاول تسيطر على نفسها



عمي لا تخاف جعلني قبلك ما فيني شيء .



بس انتوا بتتاخرون بعد

ناصر قال بحده



عفور لا تلعبين في اعصابي وش فيس صوتس تبكين



خالتس فيها شيء

عفراء من اسمعت عمها يسالها عن خالتها اذا فيها شيء قامت تبكي ولا قدرت تمسك نفسها اكثر قالت



عمي الله يخليك تعال بسرعه لا تتاخر.

ناصر من سمع عفراء عرف ان فهده اكيد فيها شيءغير طريقة عن بيت خالد لطريق البيت وقال لها



دقيقتين وانا عندكم

ناصر اول ما فتح باب الصاله حقت الفله شاف عفراء قاعده فيها تبكي بس اول ما ارفعت عينها وشفت عمها قامت تخب له وهي تقول لناصر اللي تم واقف قدام الباب وهو ماسكه بيده بعد ما لوت عليه



عمي

لمها ناصر وهو يقول بحزم



فهده وش فيها

ارفعت عفراء راسها لعمها وقالت وعيونها كلها دموع



عمي حنا كنا قاعدين نتعشى .



ادخلوا علينا فجاه مرت خالك وبنتها هادين رحبنا فيهم وقلطناهم في المجلس .



بس هم كانوا معصبين ما هب عارفه ليه وخالتي يوم شافتهم معصبين قالت لي اطلع من المجلس بعد ما طلعت سمعتهم قاموا يصارخون وصوتهم كان يوصل وين .



وعقب اطلعوا وطلعت خالتي تخب رايحه لدارها يوم لحقتها لقيتها قافله دارها ناديتها بس ما ردت علي بس كنت اسمعها تبكي .



انا خايفه عليها هي الى ذا الحين ما افتحت الباب ولا ترد علي

ناصر اللي كان ما هب قادر يفهم اللي صار حب انه يستوضح السالفه من عفراء و قال



زين انتي ما سمعت هم وش كانوا يقولون

عفراء لفت براسها تشوف ريم ومريم اللي واقفين ورا عمها ورجعت تشوفه اشاره انها ما تقدر تتحاكا قدامهم .



ناصر فهم الاشاره ولف بسرعه على البنات وقال لهم وهو يسويلهم طريق



ريم اخذي بنت عمس وروحي شوفي خالتس فوق بسرعه

ريم اللي كانت صدق خايفه على خالتها امسكت يد مريم وربعت للدرج .



ناصر اول ما شافهم اختفوا من الدرج لف يشوف عفراء وقال



قولي وش قالوا

عفراء وهي تبلع ريقها قالت



عمي اسمحلي بس هو كلام ما ينقال .

ناصر اللي بداء يفقد السيطره على اعصابه قال وهو يصر على ضروسه



عفور تحاكي وخلصيني

قالت عفراء وهي منحرجه ووجها احمر



هم كانوا يقولون لخالتي انها تبي تلعب عليك وتاخذ دراهمك.

وانهاا .

ناصر قال بحده بعد ما سمع الكلام اللي قالته عفراء



انها ويش

دنقت عفراء راسها في الارض وقات



انهاا .



ام الرجاجيل وسوده وجه وو

قطعها ناصر وقال



بس خلاص لا تكملين ولف بسرعه عنها عشان يطلع من الصاله وهو عند الباب لف عليها وقال



روحي شوفي خالتس وقعدي معها وقولي لها عمي يقول ان قال له الله ما تباتين مضيومه .



وطلع وسكر الباب وراه .

ارجوكم ابي الردود بسرعه وبصراحه اختكم تحفه فنيه

ترى القصة وايد وايد وايد وايد وايد حلوة لا تفوتكم

تحياتي *الحب المجروح**

  • رواية نسائم حب كامله بدون ردود
  • رواية نسائم حب تحفه فنيه
  • روايه قطريه للكاتبه تحفه فنيه فهده وناصر
2٬912 views

نسايم حب قصة قطرية في قمة الروعة