قصه نقاش بنت مع جدتها سنه 2050 اكثر من رائع فتاه تكلم جدتها

حوار بين فتاه وجدتها سنه 2050

الشخصيات :حفيده في سن المراهقه (12 سنوات) تجلس مع جدتها (70 سنه )

الحوار:

الحفيده : تيته ميرو ازيك..بقالى زمان ما قعدتش معاكي

الجده : وهو انا عارفه اتلم عليكي خالص.. ده انا قاعده زهقانه قوي ومش لاقيه
حاجه تسليني

الحفيده : ومابتفتحيش الدش ليه يا تيته

الجده :التليفزيون بقى ممل خالص مافيهوش غير 9700 محطه بس!.وانا كمان ما بعرفش اغير المحطات!

الحفيده : وايه الحلاوه دي؟ حلو البادي اللي انتي لابساه ده..بس ده موضه قديمه قوي
ياتيته !

الجده : يا بنتي انا ست دقه قديمه وبالبس زي ما جيلنا الصاعد اتعود وحسب
التقاليد القديمه بتاعتنا

الحفيده : ايوه بس مش حاسه انك مخنوقه وانتي لابساه؟

الجده : ابدا ده هو ده اللبس المحتشم اللي مفروض الكل يلبسه ويحافظ عليه..فين ايام
زمان لما كنا نلبس البادي اللي مبين البطن والظهر بس، مع البنطلون الاسترتش الجلد …كانت
حاجه اخر روشنه

الحفيده : ياه يا تيته.. ده انتوا كان ليكم تقاليد غريبه خالص !

الجده : وهو انتي فاكره ان ايامكم دي ايام؟ يا بنتي ايامكم دي ما يعلم
بيها الا ربنا .. فين ايام سنه 2024، هي الواحده فينا كانت تستجري تشرب سيجاره
البانجو ولا تسحب لها سطر بودره قدام ابوها؟ طب ده الدنيا كانت تتقلب ساعتها وما
تتعدلش .. امال ايه .. كان فيه حاجه اسمها اخلاق

الحفيده : معقول يا تيته؟ للدرجه الفظيعه دي!!؟

الجده : اومال انتي فاكره ايه .. وبعدين كانت الست من دول ما تلبسش اللبس
الخليع بتاع اليومين دول..يعني الجيبه كان ما يقلش طولها عن شبر وربع .. وكانوا الستات
يلبسوا فوقيها بلوزه باستمرار ..مش زي دلوقتي! حسبي الله ونعم الوكيل!

الحفيده : يا خبر .. وايه كمان ياتيته

الجده : ح اقول لك ايه ولا ايه يعني خدي عندك مثلا .. زمان كنا
نسمع الطرب الاصيل لمطربين حقيقيين زي مصطفى قمر وعمرو دياب وطبعا كانت سيده الغناء “شاكيرا”،
وكانت الاغنيه مدتها اكثر من دقيقتين متواصلين من الطرب الاصيل والموسيقى الهاديه الراسيه اللي تعمر
النافوخ بصحيح كانوا مطربين روشين واخر طحن، حسبي الله ونعم الوكيل!

الحفيده : هيه يا تيته.. وبعدين

الجده : احلى ايام بقى كانت ايام الدراسه ، الفصل كان على ايامنا رايق وعدد
التلاميذ فيه ما يزيدش عن ستين سبعين تلميذه ، وكنا ساعتها بنعرف نفهم الدرس كويس
مش زي دلوقتي، وكانت الشوارع ايامها فاضيه يعني كانت اشاره المرور تقعد ساعه الا ربع
بس لان مصر كلها كان تعدادها 80 مليون مش اكثر، تخيلي بقى الروقان اللي كنا
فيه؟ حسبي الله ونعم الوكيل!

الحفيده : 70 مليون بس؟!!

الجده : امال ايه .. عشان كده كانت كل حاجه رخيصه ، يعني مثلا كيلو
اللحمه يوم ما يضربه الدم كان يبقى بخمسين جنيه او ستين جنيه، وكان اتخن جوز
جزمه ب 250 جنيه، وكان الواحد يقدر يشتري شقه تمليك ب 250 الف جنيه بس..وكان
الدولار بخمسه جنيه بس تخيلي بقى؟

الحفيده : ما هو علشان كده الجواز على ايامكم كان سهل خالص، احنا بقى خلصنا
من العقد دي..

الجده : امال ايه .. ده احنا الواحده مننا كانت بمجرد ما توصل سن 17
سنه تبتدي تفكر في الجواز العرفى على طول، وما كانش عندنا الافكار الغريبه اللي بتعملوها
دلوقتي، انا شخصيا شايفه ان ده اوفر شويه ، ده احنا يا بنتي على ايامنا
كان لا يمكن البنت تتاخر بره البيت عن الساعه اتنين صباحا، طب ده باباها كان
ممكن ساعتها يخاصمها !

الحفيده : ياي! ده انتوا كنتوا متزمتين خالص ياتيته !!!

الجده : يا بنتي احنا اتربينا على الاخلاق والفضيله والعادات والتقاليد . يعنى كان اهل
الفن محتشمين جدا وكانوا دايما يطلعوا بالمايوهات البيكيني، والمذيعات كانوا يقعدوا جنب الضيف مش على
ركبته زي دلوقتي.. هي ي ي ي ه الله يرحم دي ايام.. فكرتيني بالذي مضى
حسبي الله ونعم الوكيل!

(تمسك الجده بتليفون محمول في حجم علبه الكبريت)

الحفيده : ح تكلمي مين يا تيته

الجده :الحقيقه انا كنت موصيه الجزار على اتنين كيلو لحمه و اديته 600 دولار عربون
وعايزه اطلبه اشوف اذا كانت اللحمه وصلت ولا لا ..

الحفيده :تضغط الريموت كنترول لنرى شاشه كبيره بطول وعرض حائط الغرفه ، وتظهر صوت مذيعه
مصحوبا بلقطات للانباء تقول:

المذيعه : هاي شله ! اليكم عناوين الاخبار

– امريكا ترصد 25 مليار دولار لراس تامر بن محمد بن اسامه بن لادن المتهم
الاول في تفجير قصر السفير الامريكي في افغانستان

– واشنطن تتهم ليبيا بتفجير سفينه فضاء فوق كوكب المريخ

– وزير الاقتصاد د. فريد يوسف بطرس غالي يصرح: اعدام الفقراء هو الحل لخروجنا من
عنق الزجاجه

– موافقه مجلس الشعب اخيرا على خصخصه معبد الكرنك

(اخبار عربيه ):

– زهوه ياسر عرفات تطالب بانسحاب اسرائيل حتى حدود عام 2030، واعلان الدوله الفلسطينيه في
مايو المقبل

– سيريلانكا والفلبين تطرد خمسه الاف خادمه كويتيه

– اسرائيل ترفض الانسحاب من البصره الا بعد ضمان امن مستوطناتها في بغداد

(اخبار الفن )

– زفاف المطربه صباح على حفيد الفنان الراحل راغب علامه

– رئيس قطاع الانتاج لم يستقر بعد على بطله فوازير رمضان ويعقد اجتماع مع السيده
توتي محمد صفوت الشريف وزيره الاعلام الجديده لمناقشه هذه القضيه

– الفنان محمد هنيدي يهاجم نجوم الكوميديا الجدد

المذيعه : فينيش باي

الجده : لا بقى حسبي الله ونعم الوكيل فيكم فعلا!

(يغمى عليها)

الحفيده :

تيته..تيته تيتاا اا ااه!!

منقوول من بريدي

ودمتم في رعايه الله وحفظه:rose::rose::rose:

• قصص مراهقه والبنطلون الجلد